கிராமப்புறம் மற்றும் வளர்ச்சியடையாத பகுதி - ராகுல் காந்தி வருத்தம் ?

"இந்தியாவிற்கு இரண்டு பக்கங்கள் உள்ளன. ஒன்று, நகர்ப்புறம் மற்றும் வளர்ச்சிடையந்த பகுதி, மற்றொன்று கிராமப்புறம் மற்றும் வளர்ச்சியடையாத பகுதி' என, காங்கிரஸ் பொது செயலர் ராகுல் தெரிவித்துள்ளார்.அருணாச்சல் பிரதேசத்தில் காங்கிரஸ் கட்சிக்கு ஆதரவாக ஓட்டளித்து, மீண்டும் ஆட்சியில் அமர உதவிய வாக்காளர்களுக்கு நன்றி சொல்வதற்காக, இடாநகரில் நடந்த கூட்டத்தில் பேசிய ராகுல் கூறியதாவது:இரண்டு இந்தியா உள்ளன. ஒன்று உயர்ந்த கட்டடங்கள், கம்ப்யூட்டர்கள், கார்கள் மற்றும் நவீன சாதனங்கள் நிறைந்த நகரங்கள் மற்றும் பெருநகரங்கள். மற்றொன்று, வசதி வாய்ப்புகள் அற்ற, வளர்ச்சியடையாத கிராமப்புறங்கள்.


நான் பிரிட்டன் அமைச்சர் ஒருவரை, சில மாதங்களுக்கு முன், கிராமத்திற்கு அழைத்துச் சென்று, கிராமப்புற இந்தியாவின் பலம் அவர்களுக்கு தேசிய கிராமப்புற வேலைவாய்ப்பு உறுதி திட்டத்தின் மூலம் வழங்கப்படும் வாய்ப்புகள், அவர்களுக்கான கடன் தள்ளுபடிகள் ஆகியவை பற்றி விளக்கினேன். ஆனால், அவரிடம் நாட்டின் வறுமையை காண்பித்ததாக, பா.ஜ., வினர் குற்றம் சாட்டினர்.தேசிய கிராமப்புற வேலைவாய்ப்பு உறுதி திட்டத்தின் மூலம் ஏழைகளுக்கு 100 நாட்கள் நிச்சய வேலை வாய்ப்பு வழங்கப்படுகிறது. அதுமட்டுமல்லாமல், கிராமப்புற ஏழை மக்கள் வளர்ச்சியடைய, 60 ஆயிரம் கோடி ரூபாய் அளவிலான விவசாயிகள் கடன் தள்ளுபடி செய்யப்பட்டுள்ளது.இவ்வாறு ராகுல் கூறினார்.